Abstract:
Ky studim analizon sfidat dhe mundësitë e integrimit të Kosovës në Bashkimin Evropian (BE). Si shteti më i ri në Ballkanin Perëndimor që synon anëtarësimin në BE, Kosova përballet me sfida politike, ekonomike dhe sociale të rëndësishme. Studimi identifikon mungesën e njohjes ndërkombëtare, sundimin e dobët të ligjit, dhe ekonominë e brishtë si pengesa kryesore.
Mungesa e njohjes nga disa shtete anëtare të BE-së, korrupsioni, dhe papunësia e lartë janë faktorë që pengojnë përmbushjen e kritereve të Kopenhagës dhe zhvillimin e qëndrueshëm.
Megjithatë, procesi i integrimit në BE sjell mundësi për përmirësimin e standardit të jetesës dhe tërheqjen e investimeve të huaja, ndërsa synon modernizimin e institucioneve dhe infrastrukturës. Integrimi mund të ndikojë pozitivisht në forcimin e marrëdhënieve rajonale dhe promovimin e paqes dhe stabilitetit. Për të përballuar këto sfida dhe për të shfrytëzuar mundësitë, rekomandohet që Kosova të vazhdojë me përkushtimin e saj ndaj reformave dhe të intensifikojë bashkëpunimin rajonal dhe ndërkombëtar. Angazhimi i thellë është jetik për të siguruar përparimin e Kosovës drejt anëtarësimit në BE.
